Mālō Palēmia Tu’i’onetoa mo e Pule’anga lolotongá, tanu ngaahi hala ‘o e fonuá

Fakatokanga’i ange ko e tanu hala ko e fo’i ngaue lelei taha ia ‘a ha pule’anga ki hono kakai. Ko ‘ene toki a’u tonu ia ‘a e ‘ofa ‘a ha pule’anga ki hono kakai ‘aki hono tanu honau ngaahi hala. Ko e pule’anga ‘o e kakai ma’ae kakai ki he kakai ko hono fakafotunga totonu ‘ena ‘oku fai ‘e he pule’anga lolotonga ‘aki ‘a e tanu hotau ngaahi hala. Kapau ‘e ‘alu ‘etau pa’anga ke ‘osi ki he tanu hala, ‘e kei laka ange pe ia ‘i ha to e ngaue ‘e fai ki he kakai. Ko hono ‘uhinga he ko e fo’i me’a pe ia ‘e taha ‘oku ‘ikai ke filifilimanako pe lau lanu ki ha taha.’Oku lave ki he taha kotoa.

Kou sio kihe fakakaukau ‘a e kau PTOA ‘ene fakapo’uli tu’u’o nau hange tofu pe ko ha kakai ‘oku mahaki’ia faka’atamai, hufanga he fakatapu kau ngaue’aki ‘a e lea ‘oku mahino. Ko e hala pule’anga ‘oku ‘ikai ke lau lanu ia pe filifilimanako ki ha me’a.’Oku ne tali ‘a e tau’ataaina ‘a e tokotaha kotoa ‘o ‘ikai ke toe fakatale’i. Ko hono ‘uhinga he ‘oku ngaue’aki ‘e he poto mo e vale, polioo mo e hape, noa mo e ‘ipo, pepe mo e ki’i leka,talavou pe finemui,finemotu’a mo e motu’a pea a’u ki he kau vaivai kuopau ke nau ngaue’aki ‘a e hala.

‘Oku ou manatu lelei ki he fo’i taimi he 2015 ko e kamata’anga ia ‘o e pule’anga ‘o e Palemia kuo malolo Akilisi Pohiva pea ‘i he taimi na’e kei Minisita MOI ai ‘a Etuate Lavulavu. Ha’u ‘a Lavulavu ia ke tanu ‘a e hala ki he ‘api ‘o e ‘eiki Palemia maloloo kuo kaila ‘a Mateni Tapueluelu ke tuku pea ke ta’ofi e tanuhala e hala ki he ‘api me’a’anga ‘o e ‘eiki Palemia malolo mo e ngaahi fakanafala kehekehe. Ne iku ke ta’ofi ai ‘a e tanu ‘o e hala ki he ‘api ‘o e Palemia malolo.

He toki me’a fakaloloma mo’oni ko e fa’ahinga politiki fakapo’uli pehe? Ko ‘eku fehu’i atu? Ke tuku e tanu e hala ki he ‘api ‘o e ‘eiki Palemia malolo he ko ia tokotaha pe ‘oku ne ngaue’aki ‘a e hala? ‘A e fakapo’uli ko ee ‘a e fakakaukau. Ne mei si’i ngaue’aki ‘a e hala ‘e he kakai ko ia ‘oku nau nofo he feitu’u ko ‘eni ki he’enau fefononga’aki. Koe’uhinga ia ‘e ‘ikai ‘aupito ke ma’olunga ange ‘a e mahu’inga ‘o e pa’anga he mo’ui ‘a e kakai. Malie pea to e lesoni ‘a e fo’i ngaue ma’ongo’onga ‘oku fai ‘e he Paati ‘a e kakai ma’ae kakai ki he kakai.

 

Faka’apa’apa atu

Eliesa Fifita-Tufuenga/Kolomotu’a.

Leave a Reply

Your email address will not be published. Required fields are marked *