MA‘U FAKAMATALA KUO FAKAMANAMANA‘I ‘E HE KAU TOLI FO‘I ‘AKAU KO E KAKAI TONGA HA KAKAI TIMOA ‘I ‘AOSITELELIA.

Kuo ma‘u ha fakamatala falala‘anga kuo hanga ‘e ha kau toli fo‘i ‘akau Tonga ‘i he vahenga Kuinisilani ‘i ‘Aositelelia ‘o fakamanamana‘i ha kakai toli fo‘i  ‘akau  mei Timoa. ‘Oku hoko ‘a e fa‘ahinga ‘ulungaanga kovi ko ia ‘a e kakai Tonga he polokalama toli fo‘i ‘akau ko ha me‘a ia ke ne uesia ai ‘a e va ‘o Tonga mo Timoa. Ne iku ai foki ke lue lalo ha taha ‘o e matakali ni ‘o launga ki he kau polisi ‘i he feitu‘u ni fekau‘aki mo e me‘a ni.

‘Oku pehe ne hoko ha ki‘i feta‘efemahino‘aki ‘i he vaha‘a ‘o e kau toli ‘a Tonga mo e kakai Timoa ‘oku nau kau he polokalama toli ‘o iku ai ko ‘eni ke fai hono launga‘i ko ia ki he kau polisi. ‘Oku pehe ne ‘alu ‘a e kau Tonga ‘i ha me‘alele ki he feitu‘u ‘oku nofo ai e kainga mei Timoa ‘o fakamanamana‘i kinautolu.

‘Oku fai ai ‘a e hoha‘a ‘a e kau Tonga he feitu‘u ni ke fai ha ngaue ki he kaveinga ni he vave taha telia na‘a hoko ha palopalema ‘o toe lahi ange fekau‘aki mo e kaveinga ni. ‘Oku te‘eki foki ke mahino mai pe ko e ha ‘a e mo‘oni ‘o e me‘a ni ka ‘oku mahino pe ne a‘u ki he ‘Amipasitoa Timoa ‘i Kenipela ‘a e fetu‘utaki fekau‘aki mo e me‘a ni.

Ko e hoha‘a lahi taha he kaveinga ko ‘eni ‘oku nofo ia mo tefito ki he tailiili  ‘a e kau Tonga he feitu‘u ni ‘oku nau nofo ‘Aositelelia telia na‘a uesia ai e polokalama toli ‘o iku ai ke mole hotau faingamalie ki he toli fo‘i ‘akau he feitu‘u ni pea ‘oku ‘ikai ko e feitu‘u pe ko ‘eni ‘oku hoko ai e palopalema ka ko hano kaniseli fakalukufua ‘a e toli mei ‘Aositelelia ‘o mole ai hotau faingamalie. Ko ia ai ‘i he‘ene pehe ‘oku fai ai ‘a e hoha‘a na‘a lava ke ta‘ofi ‘a e fa‘ahinga ‘ulungaanga pehe hotau kakai.

Ko ia ai ‘oku ‘oatu ‘a e kole ko ‘eni ki hotau kakai mo kinautolu kainga Tonga he feitu‘u ni ke mou poupou ke fai ha ngaue ke ta‘ofi ‘a e fa‘ahinga ‘ulungaanga pehe ni hotau kakai. ‘Oku tau ‘amanaki pe ‘e ‘ikai ke mole hotau faingamalie ki he toli koe‘uhi ko e fa‘ahinga fakakaukau fakavalevale pehe ni ‘oku fekuki mo hotau kainga Tonga ‘oku nau fakakaungatamaki he toli ‘i he vahenga Kuinisilani mei ‘Aositelelia.

 

Faka‘apa‘apa atu

Eliesa Fifita-Tufuenga/Kolomotu‘a  

Leave a Reply

Your email address will not be published. Required fields are marked *