FAKALAO KAKATO ‘A E TO E FILI ‘O NOPELE FUSITU’A KI HE FALEALEA ‘O TONGA – FALE’I IA ‘A E LOEA MATAOTAO KO CLIVE EDWARD

Fakafiefia lahi ko hono to e fili pe ‘e he kau Nopele ‘a Lord Fusitu’a ki he Falealea ‘o Tonga.
‘Oku ‘i ai ‘a e fiefia lahi ki hono to e fili ‘o Lord Fusitu‘a ke hoko ko e fakafofonga Nopele mei Niua ki he Fale Alea ‘o Tonga ‘o hoko atu kae ‘oleva ke ‘osi hono teemi ‘i he Fale Alea ‘a ia ‘e toki ‘osi ki he ta‘u 2021. ‘Oku ‘ataa pe foki ‘i he Lao ‘a e founga ko ‘eni ki hono to e fili ‘o Lord Fusitu‘a neongo kuo fuoloa ‘a ‘ene mama‘o mei he fale alea ‘o a‘u ki he ta‘u kakato ‘e taha.

Mahino ‘a hono tu‘unga ‘i he tafa‘aki ‘o e lao pea ‘oku fu‘u fiema‘u lahi ha kakai ‘oku nau ‘ilo ki he lao ke nau memipa he falealea koe‘uhi ko e fale alea ko e fale fa‘u lao.

Ne mea’i ‘e he kau Nopele ‘a e mahu‘inga ke ‘i ai ha taha ‘oku ‘i ai ha‘ane ‘ilo mo taukei makehe ‘i he mala‘e ‘o e lao ke hoko atu e ngaue pea ‘oku makatu‘unga mei ai ‘a ‘enau kei fili ki he fakafofonga ‘oe kau Nopele- ‘a Lord Fusitu‘a koe‘uhi ko e sio fakapotopoto ki he ngaahi ngaue ‘a e fale ki he kaha‘u pea mo e faka‘amu ko ia ke ‘i ai ha taha ‘iate kinautolu tepile ‘a e kau Nopele ‘oku ‘i ai ha‘ane ‘ilo mo e taukei he mala‘e ‘o e lao.

Na’e ‘i ai ‘a e ngaahi talanga kehekehe ‘i he ngaahi media lahi ‘i hotau fonua ni pea a‘u atu ai pe foki ki he ngaahi media fakasosiale. Ne ‘i ai ‘a e letio FM ia ‘e taha ‘a ia ko e Le‘o ‘o e Kele‘a- na‘a nau faka‘eke‘eke ‘e kinautolu ha tokotaha ako lao ko hono hingoa ko ‘Ana Fifita Tupou ‘i he kaveinga tatau pea hili ‘a e faka‘eke‘eke ne nau hoko atu ai pe ki ha felafoaki he kaveinga ni pea na‘e pehe ai ‘e he tokotaha na’e faka‘eke‘eke ‘e he letioo ‘Ana Fifita Tupou ‘oku ta‘e fakalao ‘a hono toe fili ko ia ‘o Lord Fusitu‘a ki he falealea.

Na’e ma‘u faingamalie ‘a e ongoongo ‘a e Tonga Ma‘a Tonga ke fai ha fepotalanoa‘aki mo e taha ‘o e kau loea mataotao pea toe ‘iloa foki he mala‘e ‘o e lao ‘i hotau fonua ni kae pehe ki he pasifiki mo mamani lahi foki ko Clive Edwards. ‘I hano ‘eke ka Clive pe ko e ha ha‘ane lau ki he pehe ko ia ‘oku ta‘e fakalao ‘a hono toe fili ‘o Lord Fusitu‘a ke ne toe hoko ko e memipa fale alea pea na‘e pehe ai ‘e Clive Edwards ‘oku totonu ke hanga ‘e he tokotaha na‘a ne fai ‘a e tali ngali vale ko ‘eni ‘o tuhu‘i pau mai ko fe ‘a e kupu‘i lao ‘oku ne talamai ‘oku ta‘e fakalao ‘a hono toe fili ‘o Lord Fusitu‘a. Ko e anga ‘a e tu‘u ‘a e lao pea ko e tu‘utu‘uni pe ia ‘a e fale alea ‘oku pehe ai kapau ‘e mama‘o ha memipa ‘o laka hake ‘i he ta‘u ‘e taha ‘e mole leva ‘a hono faingamalie ke hoko ko e memipa he fale alea pea ‘e toe fokotu‘u leva ke fai ha fili fo‘ou ka ‘i he fili fo‘ou ko ‘eni ‘oku ‘ikai ke mole ai ‘a ‘ene totonu fakakonisitutone ‘a Lord Fusitu‘a ke kau ‘i he fili tukukehe kapau na’a ne fai ha hia ‘o hange ko e hia talisone. Ko ia ai ‘oku hala ‘a e pehe ko ia ‘oku ta‘e fakalao ‘a e toe kau atu ‘a Lord Fusitu‘a ki he fili si‘i ko ‘eni he ‘oku ‘ikai ke uesia ai ‘a ‘ene totonu fakakonisitutone ke kau ki he fili si‘i ‘a e kau Nopele.
Ko e talu foki ‘eni ‘a e tengetange ‘a Lord Fusitu‘a mei he ta‘u kuo ‘osi 2019 ‘o iku ai ke ‘ave mei Tonga ni fakafalemahaki ki Nu‘usila ‘i ha vakapuna makehe koe‘uhi ke haofaki‘i ‘a ‘ene mo‘ui he na‘e tu‘u ‘i he tu‘unga matu‘aki fakatu‘utamaki ‘aupito pea fakafeta‘i ne kau ‘a langi ‘o tau fonua ‘a e feinga ki he ‘eiki Nopele.

Ko e me‘atatau pe foki ne hoko ki he ‘Eiki Palemia malolo kuo pekia ‘o Tonga, Samuela Akilisi Pohiva ‘i hono ‘ave fakafalemahaki mei Tonga ‘i ha vakapuna makehe ke fai ‘a hono faito‘o ‘i Nu‘usila kae pango he na‘a ne to tau ai pe ‘o ‘ikai ha me‘a ‘e toe felave ki he‘ene mo‘ui ka ne si‘i pekia ai pe.

‘Oku ‘i ai ‘a e fakafuofua ‘e toki me‘a mai ‘a Lord Fusitu‘a ‘i Tisema ke kau ki he fale alea ki he ta‘u fo‘ou.

Mahino pe ‘oku ne mo‘ui lelei ‘aupito ke hoko atu e fua fatongia ki hotau ki‘i fonua.

Faka ‘apa ‘apa atu
Eliesa Fifita-Tufuenga/Kolomotu’a.

Leave a Reply

Your email address will not be published. Required fields are marked *