KAMATA ‘I SIULAI TOTONGI KOLONITINI KAU FOLAU KOTOA PE MEI MULI

13 Mē, 2021.

‘Oku ‘i ai ‘a e fokotu’utu’u fakaangaanga ke totongi ‘a e kolonitini ‘a e kau folau kotoa pē mei muli ‘o kamata ‘i Siulai 2021.

Ko e palani fakaangaanga ko ení ne ‘osi tali ia ‘e he Kōmiti Fakafonua ki he Ngaahi Me’a Fakatu’upaké pea mo e Kōmiti ki hono Tokangaekina ‘o e Covid-19 ke fakahoko ha ngāue ki ai pea toki fakahū ange ke vakai’i. Ka tali ai pē ‘e he Kōmiti ‘e toki fakahū atu ki he Kapinetí ke fai hano aofangatuku.

Fakatatau ki he fakamatala ‘e Pule Lahi ‘a e Potungāue MEIDECC Paula Pouvalu Ma’u, “Na’e ‘osi tālanga’i pē ‘e he kōmití koe’uhí ko e fu’u mamafa ‘a e totongi kolonitiní. Ko hono kolonitini ha kau pāsese mei he vakapuna ‘e taha ‘i he Hotele Tanoa ‘oku meimei ofi ‘i he Pa’anga $600,000 ‘a e fakamole ki ai ‘a ia ‘oku fakafuofua ko e $4,000 ‘a e kolonitini ‘aho ‘e 21 ki he tokotaha.”

Vakapuna ki Sune
‘Oku ‘amanaki ke tu’uta ‘i he uike ‘uluaki ‘o Suné ‘a e vakapuná ‘e ua mei ‘Okalani, Nu’usila pea mo Brisbane, ‘Aositelelia. Ko e vakapuna mei Nu’usilá ‘e tu’uta ia ‘i Tonga ni ‘i Sune 2 pea ko e vakapuna mei Brisbane ‘e toki folau mai ia ki Tonga ni ‘i Sune 3.

Ko e vakapuna ko ia mei Brisbane ko e fuofua vakapuna ia ‘e ha’u ‘i he Polokalama ‘a ‘Aositelelia ko e Pacific Flight Program, ‘o ‘ikai ke toe totongi ‘e he Ngaahi Kautaha Toli Fua’i ‘akaú.

Leave a Reply

Your email address will not be published. Required fields are marked *