POLOKALAMA TELEVISONE FAKA‘EKE‘KE FEKAU‘AKI MO E TA‘U 100 ‘O E PAATI KOMINIUSI ‘A E LEPAPULIKA E KAKAI ‘O SIAINA

Fakafe‘iloaki – Susana Pola‘apau

‘Oku ou tomu‘a tuku ha fakatapu ki he ‘afio ‘a e ‘Otua Mafimafi hotau lotolotongá, pea ‘oku ou kole keu hufanga atu he talakakato ‘o e fonuá mo e lotú, pea puipui ange he mo hou‘eiki kae ‘atā ke mau fakahoko atu ‘ae polokalama ko eni mei he kautaha ongoongo ko e Tonga Ma‘a Tonga, mo e Kingdom Sun Media.

Ko e polokalamá ni ‘oku fekau‘aki ia mo e ‘amanaki ke fakahoko he ‘aho ‘uluaki ‘o Siulaí, ‘a hono fakamanatu ‘o e a‘usia ‘e he Paati Kominiusi ‘a Siaina ‘a hono ta‘u 100 ‘i he Lepapulika ‘o e Kakai Siaina.

‘Oku ou ‘i heni mo e Amipasitoa malōlō, Kēnolo Siamelie Latu ‘a ia ‘oku ‘ikai sola ki he kakai ‘o e fonuá kae ‘uma‘a ‘a Dr. ‘Unaloto Sili ‘a ia na‘á ne toki foki mai mei Siaina hili ia ‘ene lavai‘i lelei ‘a ‘ene ako ki hono mata’itohi PHD ‘i he pisinisí mo e laó.

‘Oku ou fiefia ‘a e Kautaha ongoongo Tonga Ma‘a Tonga Kingdom Sun Media ke talitali lelei kimoua he polokalama ke fai ha talamonū ki he ‘Ofisi ‘o e ‘Amipasitoa Siaina mo ‘ene kau ngāue pea pehee ki hotau kāinga Siaina ‘i Tongá ni ‘i he ‘amanaki ke hokosia ‘a e ta‘u 100 ‘o e Paati Kominiusi ‘a Siaina.

‘I he ta‘u ‘e 100 ko eni kuo hili, na‘e lahi ‘aupito e ngaahi fakalakalaka mo e ngaahi liliu ‘i he nofo ‘a e sosaieti Siaina pea kuó ne tohoaki‘i ai e tokanga ‘a e ngaahi fonua lālahi ‘o māmani ‘i he ‘ahó ni; koe‘uhi he ‘oku ‘alu ke toe lahi ange ‘a e kakai ‘oku nau faka‘ofo‘ofa‘ia mo sai‘ia he ngaahi fakalakalaka ‘oku hā sino mai ‘i Siaina.

Kenolo Siamelie Lātū, kātaki ‘o ki‘i lave si‘i mai ange ki he puipuitu‘a ‘o e Paati ko eni ‘oku iloa ko e Paati Kominiusi ‘a Siaina.

Siamelie Lātū: Ko e hisitōlia ‘o Siaina ‘oku lōloa faufaua pea mahu‘inga. Pea ‘oku faingata‘a ki he kakai ‘o e ngaahi pule‘angá ke nau mahino‘i koe‘uhi ko e kehekehe ‘i he hisitōlia, ‘ulungaanga fakafonua, mo e tu‘unga fakapolitikalé. Pea ‘i he‘ene pehēe ‘oku ou tui ko hono toe mahino‘i ange ‘a e hisitōlia ‘o e Paati Kominiusi ‘a Siainá ko e founga ia ke toe māhino ange ‘a e Siaina ‘o ‘ahó ni. Talu mei hono fokotu’u ‘o e paatí ni mo ene takimu‘a he fakalakalaka mo hono liliu ‘o Siaina ki he Siaina fo‘ou ‘o e ‘ahó ni. Pea ‘i he sio ko ia, ‘e lava pe ke tau pehee ko e hisitōlia ‘o e Paati Kominiusi ko e hisitōlia ia ‘o e ngaahi faingata‘a mo e ngaahi pole lahi na‘e fe‘ao mai mo e kakai ‘o Siaina.‘I he taimi na‘e fokotu‘u ai e Paati ni ‘i he1921 na‘e laka si‘i hake pe he toko 50 ‘a e kau mēmipa ‘o e Paati. Ka ‘i he 2011 ‘a ia ko hono ta‘u 90 ia kuo a‘u ki he toko 80 miliona ‘a e tokolahi ‘o e Paati.

Tokotaha Faka‘eke‘eke: Kēnolo, kātaki talu mei he 1921 hono fokotu‘u ‘o e Paatii, ko e hā ngaahi me‘a lalahi kuo fakahoko ‘e he paati ni, ke fakafuo ‘aki ‘a e fonua ‘o a‘u mai ai ki he ‘aho ni. Koe‘uhi talu e tau tupu hake mo ‘etau fanongo pē ki he fo‘i lea kominiusi ‘oku hangē ia ha me‘a ‘oku kovi.

Siamelie Lātū: ‘Oku mo‘oni ho‘o laú koe‘uhi talu ‘etau tupu mo ‘etau fanongo pe ki he ngaahi fonua ‘o e Hihifo tautautefito ki ‘Amelika mo Pilitānia mo e ngaahi fonua kehe o ‘Iulope mo ‘enau ngaahi fokotu‘utu‘u fakapolitikale mo e faka‘ekonōmika. Pea ko e fo‘i lea pe oku tau fanongo ai ko e Temokālati, Pule‘anga Fakatu‘i, fakatupu koloa, ko e ha e tupu ‘oku ma‘u, pisinisi. Ko hono ‘uhinga he na‘e fu‘u mālohi ‘aupito a ‘Amelika hono tu‘uaki ‘o e Temokālati pea mo ‘ene feinga ke mafola ‘i māmani. Hili e tau lahi hono ua na‘e tō lalo ‘aupito ‘a e ngahi fonua ‘o ‘Iulope pea na‘e fokotu‘u ai ‘e ‘Amelika ‘a e polokalama ko e European Recovery Program ke tokoni‘i ‘a ‘Iulope mo ta‘ota‘ofi e mafola ‘a e kominiusí ‘i ‘Iulope. Na‘a tau pehee ai pe ko e me‘a lelei ia kae kovi e Kominiusí. Ka ‘oku mahu‘inga pe ke tau siosio lelei ko e hā e lelei kuo ‘omai ‘ehe Pule‘anga ko eni kuo ‘alu hake ia ‘o fika ua ‘i mamani he me‘a kotoapē, pea oku tā iliili ai ‘a ‘Amelika he ngaahi ‘ahó ni mo e ngaahi fonua he Hihifo he vave ‘a e fakaakeake ‘a Siaina mei he masivá mo ‘enau kaka faka‘ekonōmika ki ‘olunga. Kaikehe teu foki ki ho‘o fehu‘i.
Talu mei he 1921, na‘e ‘i ai e ngaahi me‘a lālahi ‘e 3 na‘e hanga ‘e he Paati ko ‘eni ‘o fakafuo ‘aki ‘a e fonuá:
1. Ko e Revolution pe koe Liukava
2. Ko e Construction pe ko hono langa e fonua;
3. Ko e Reform: Ko hono fakalelei mo fakaakeake e fonuaa
Pea ‘oku ou tui ‘e si‘isi‘i e taimi ia ke lava ke fakama‘opo‘opo ai ‘a e founga na‘e fou ai e Paatí he ngaahi me‘a ko eni ‘e tolu. Kae tuku keu tomu‘a lave atu ki he Liukava na‘e hoko he fonuaa.

Ko e fonua hisitōlia lōloa ‘a Siaina pea sivilaise motu‘a. Ko e makape ‘a Siaina ki ‘olunga na‘e makatu‘unga pe ia ‘i he ngāue mālohi, ‘ilo, mo e sivilaise mā‘olunga mo fisifismu‘a talu mei he ta’u ‘e 100 kuo hili.
Ka ‘i he a‘u mai kihe senituli 19 ne kamata ke tō lalo e sivilaise ki he ngoué ‘i Siaina. Kamata ke mole ‘a e anga e nofo ‘a e hou‘eiki mo ‘enau pulé, ‘a ia na‘e fononga mai meimei ta’u 1000 ki he 2000 tupu. Na‘e hoko ‘a Siaina ia ko e fonua mo‘umo‘ua he kuonga ko ia, kae a‘u mai ki he Ha‘a Tu‘i Qing Dynasty 1644-1911 na‘e hoko ai ha moveuveu lahi, maumau fakapolitikale, ta‘e malava ke mapule‘i e kau tau, pea a‘u ‘enau tu‘unga fakapa‘angá ki he tō lalo pea na‘e a‘u pe ia ki ha tu‘unga fakamā lahi.

Koe‘uhi ko Siaina he taimi ko ia, na‘e kei tātāpuni ia ki māmani ‘i he‘ene tu‘utu‘ú ni ngāue pe na‘e ui ko e closed door policy, na‘e si‘isi‘i ai ‘a e ‘ilo ‘a Siaina ki he ngaahi liliu ‘oku hoko fakamāmani lahí ‘i he tu‘unga e nofo. Na‘e hu mai e ngaahi fonua mei he Hihifo ‘o kamata ke nau kumi fonua.
1840 na‘e kamata ai ‘e Pilitānia ‘a e First Opium War ‘o ne ‘ohofi tau ‘a Siaina mo fakamoveuveu ‘i Siaina. Hanga ‘e Pilitania ‘o fuofua fakaava e closed door policy ‘a e Qing Dynasty. Kamata ke hū mai ngaahi fonua mei he Hihifo ‘o fai ‘a hono ‘ohofi tau ‘o Siaina.

1856-1860 na‘e hoko ai tau hono ua Second Opium War. Na‘e toe ‘iloa ko e Second Anglo-Chinese War ‘a ia na‘e kau fakataha ai ‘a Falanisē mo Pilitānia ke tukuhifo ‘a e Pule‘anga na‘e pule‘i ‘e he Qing Dynasty talu mei he 1644 ki he 1912.

1883-1885 na‘e hoko mai ai e tau ko Falanisē ia mo Siaina pe Sino-French war. Koe tau eni a Siaina mo Falanisē fekau‘aki mo Vietnam pe ko hai tene pule‘i.

1894-1895 hoko ai tau ‘a Siaina mo Siapani First Sino-Japanese war. Koe tau ia ‘a Siaina mo e ‘Emipaea o Siapani fekau‘aki mo e Pule‘anga fakatu‘i ‘o Kolea.

1900-1901 War of Aggression pe tau pehee ko e tau fakamanu ‘eni hufanga he fakatapu, na‘e fakahoko ‘e he ngaahi fonua fakatahataha na‘e ui ko e Eight -Power Allied Forces ‘a ia ko Pilitānia, ‘Amelika, Falanisē, Siamane, Siapani, Lusia, ‘Ositūlia, mo ‘Itali. Na‘a nau feinga ke fakamālohi‘i ‘a Siaina ke fakamo‘oni he ngaahi tālite na‘e ui ko e Protocol in Human Civilization.

Pea hoko e ngaahi talite ko eni ke hanga ai ‘e he ngaahi fonua muli ko ‘eni ‘o fetuku e ngaahi koloa ‘a Siaina ke totongi ‘aki e ngaahi maumau na‘e fakahoko ‘e Siaina ‘i honau fonua, pea nau puke mo e ngaahi kau‘āfonua ‘o Siaina. Ko e tu‘unga koee ‘o Siaina he kuonga ko eni ne mole ‘enau tau‘atāina mo honau mafai ‘o ‘ikai ke nau toe lava ‘o pule‘i kinautolu. Tō ai e Qing Dynasty, movetevete ai e sōsaieti tukufakaholo ‘o Siaina he feinga ‘a e ngaahi fonua muli ko eni ke nau puke fakamālohi e ngaahi vahe fonua ‘o Siaina. Neongo na‘e tō e pule ‘a e Qing Dynasty ka na‘e ‘ikai pehee ke tukulolo ai e kakai Siaina, na‘a nau kei fakafepaki‘i fefeka pe ‘a e ngaahi fonua muli ko eni.
‘I he senituli 19, na‘e ‘asi hake ‘a e kulupu ko e Taiping Heavenly Kingdom Movement ‘o nau fakafepaki ki he hū mai ‘a e kau muli ki Siaina. Ko e movement ko eni ko e kau faama ia mo e fa‘ahinga masivesiva, kau leipa, kau ngōue, pea ko e kau takimu‘a eni he Boxer Movement. Ko e kau boxers ko e fa‘ahinga na‘a nau ‘iloa he mala‘e ‘o e martial arts.

Taimi tatau na‘e ‘asi mai leva e fa‘ahinga tokolahi mo honau loto ke nau poupou ki he ngaahi founga koē ‘o e ngaahi fonua he hihifo ‘o nau fokotu‘u ‘a e kulupu na‘e ui ko e Westernisation Movement pea na‘a nau tui kinautolu ki he pule‘anga fakatu‘i.

‘I he Senituli 20, na‘e tō lalo lahi ‘aupito e fonuā. ‘I he 1900, na‘e hū mai ai ‘a e kautau fakatahataha ‘a Siapani, Lūsia, Pilitānia, ‘Amelika, Siamane, Falanisē, ‘Itali mo ‘Ositūlia ‘o nau puke fakamālohi ‘a e kolomu‘a, Peking. Kaikehe na‘e ‘ikai holomui ai ‘a Siaina ka na‘a nau tu‘u hake ke fakafepaki.
‘I he 1905 na‘e ‘asi mai leva e tangata ko Sun Yat -Sen ko e paionia ia ‘o e Chinese Democratic Revolution, na‘a ne fuofua fokotu‘u ‘a e Paati na‘e ‘iloa ko e Kuomintang pe ko e Nationalist Party of China. Ko ‘enau taumu‘a ke fai ha liukava kae lava ‘enau fakakaukau.

Na‘e kamata he 1911 ‘a e Liukava, pea ‘i he 1912 na‘a nau fanongonongo leva ai e Pule‘anga Fo‘ou ko e Republic of China.

Na‘e iku ‘o mole ai e pule ‘a e Qing Dynasty he 1911 mo e pule ‘a e Hou‘eiki ‘a ia ne nau pule‘i ‘a Siaina he ngaahi ta‘u e lauiafe. Kamata leva ke ‘asi mai e ngaahi fakakaukau ‘o e pule faka temokālati ‘i he kakai ‘o Siaina. Ka neongo ia na’e ‘ikai ke pehee kuo hoko a Siaina ko e pule‘anga lepapulika, pea pehee ai kuo ma‘u ha tau‘atāina kakato pea mo ha pule‘anga temokalati. Ko e kau tau koia naa nau kau he liukava oe 1911 na‘e asi mai ai ngaahi kulupu fakapolitikale kehekehe mo e tui kehekehe pea iku ai pe Siaina ke nofo masiva, mamahi, he na‘e kei fakafepaki pe ‘a e hou‘eiki kia Sun Yat Sen mo e kau Kuomintang.

Tokotaha Faka‘eke‘eke : Kataki Kēnolo, kake lave ange mu’a hili hono ma’u koia ‘ae Pule’anga Lepapulika ‘a Siaina he liukava 1911 na’e anga fefee leva mei ai ‘ae makape hake ‘a e Paati Kominiusi ‘a Siainá ‘o pule’i e fonuaa lolotonga ia ‘osi fakalele mai ‘ehe Pule’anga Fakatemokalati.

Siamelie Lātū: Mālō, hili e liukava ko ia he 1911 pea ma‘u ai e Republic of China na‘e kei nofo pōpula pe ‘a Siaina, he iku‘anga ‘o e ngaahi liukava.

‘I he ngaahi talite ko ia na‘e osi fakamo‘oni‘i hono fakamalohi‘i ‘e he kau tau fakatahataha ‘a e Allied Forces, na‘e iku ai ‘o ma‘u ‘e Pilitānia ‘a Hongkong, ma‘u atu ‘e Lūsia ‘a e tafa‘aki fakatokelau ko ia ‘o Heilonggiang. Pea hū mai leva e kau Potukali ki Macao, to‘o atu ‘e Siamane ‘a e vahe fonua na‘e ui ko Jiaozhou Bay pea puke atu leva e Siapani a Taiwan, pea na‘e mālohi leva e hanga ngaahi fonua Hihifo ‘i hono fakalele ‘a e toenga ‘o Siaina. Na‘a nau langa e fefakatau‘aki, langa e ngaahi kautaha, fokotu‘u mo e ngaahi ‘apitanga sōtia, fokotu‘u mo e lotu, kasitomu, pea hoko ai a Siaina ko e Semi Colonial & Semi Feudal Country.

Ka ko e kamata ‘o e Paati Kominiusi ‘a Siaina, teu pehee ko e konga ia ‘o e palani mo e fokotu‘utu‘u ‘a e Paati ‘iloa ‘i Lūsia ko e Bolsheviks global strategy of world revolution ‘i he‘enau feinga ke tohoaki‘i ‘a māmani ki he tui faka-kominiusi. Na‘e ui pe ko e Communist International’s Comintern’s. ‘A ia ko e taumu‘a ke fakamafola e tui fakakominiusi ‘i he ngaahi fonua ‘o e Hahake ‘o ‘Esia pea ke feau e fiema‘u ‘a Lūsia ‘i he ngaahi fonua mama‘o ‘i he Hahake Far East.

Lolotonga e vaha‘a taimi 1918-1921, na‘e kamata leva ke hanga ‘e Soviet Russia pea mo e Comintern ‘o ave kau fakafofonga faka-tipilōmetika ki Siaina pea nau kamata leva ke fakakau mai honau ngaahi fakafofonga ‘i Siaina pe ko e ngaahi agents. Pea ko e fa‘ahinga kakai eni na‘a nau ngāue lahi ke nau vaōfi mo e ngaahi kautaha kehekehe ‘i Siaina, ngāue vaofi mo e ngaahi kulupu tui fakapolitikale kehekehe. Kamata ke nau fai e ngaahi tu‘uaki kehekehe he ongoongo, fa‘u e ngaahi makasini ta‘etotongi pea fa‘u mo e fanga ki‘i pepa pe fekau‘aki mo e kominiusi mo hono lelei. Nau a‘u atu ki he fānau ako mo e ngaahi kautaha kehekehe pea iku ai ‘o fokotu‘u ai ‘a e Movement na‘e ui pe ko e May 4th Movement.

Na‘e kamata leva ke nau fakalotoa e kakai ‘a ee ‘oku ‘ikai ke nau ‘ilo lahi ki he tui ‘a Karl Marx. Na‘e ui ia ko e May 4th Movement pe ko e New Culture Movement. Na‘e kamata ia he 1915 hili ia e liukava na‘e ‘ikai lava he 1911 ke fokotu‘u ‘a e pule‘anga lepapulika, pea hokohoko atu ai pe ‘enau ngāue ‘o a‘u ki he 1920.

Hili ko ia hono fokotu‘u e 4th May Movement, na‘e ‘i ai e kulupu ia na‘e toe ‘asi hake, ko e kau mataotao ‘atamai‘ia na‘a nau feinga ke nau kumi ha founga ke fakahaofi ai e fonua, mālu‘i e fonua mo hono kakaí. Na‘e kau ai ‘a e ongo tangata ‘iloa ko Mao Zedong, mo Zhou Enlai he‘ena kei talavou si‘i. Na‘a nau hanga ‘o ako pea mo fakahoa e ngaahi tui kehekehe ko eni ‘o nau tui ai ki he tokāteline ‘a Marx mo Lenin pea nau feinga leva ke faka‘aonga‘i ‘a e ngaahi tefito‘i mo‘oni ko iá ko e me‘angāue ke liliu e tui ‘a e fonua. ‘I he puli atu ‘a e May 4th Movement ne hoko leva kau poto ko enii ‘a ia kuo osi fakanaunau kinautolu he ako loloto ki he tokāteline fakakominiusi ‘o nau fa‘u leva mo fokotu‘u ‘a e Paati Kominiusi CPC ‘i Shanghai, Peking, Wuhan, Changsha, Jinan mo Guangzhou. Hili hono fokotu‘ú na‘a nau toe fepaki pe mo e faingata‘a lahi he‘enau feinga ke tu‘u ‘enau fakakaukau.
‘I he ‘aho 23 ‘o Siulai, na‘e ‘i ai e kau fakafofonga ‘e13 ‘o e fuofua Paati Kominiusi ‘a Siaina mei he ngaahi vahe fonua kehekehe na‘e a‘u honau tokolahi ki he 50 mei he ngaahi tapa kehekehe ‘o nau fuofua fokotu‘u ‘a e ‘uluaki Falealea ‘o Siaina. First National Congress of the CPC ‘i Shanghai. Na‘a nau fakataha fakapulipuli holo pe pea ‘ilo pea hiki e fakataha ki he vaka takimamata he vaitafe ‘i he vahefonua ko Zhejiang Province. Pea ko e fuofua fakataha ko ia na‘a ne fakafofonga‘i ai ‘a e fuofua fokotu‘u faka‘ofisiale ‘o e Paatii. Kaikehe, ko e ‘aho 23 Siulai ko e ‘aho ia na‘e fuofua fokotu‘u ai ‘a e ‘uluaki fakataha Falealea ‘a Siaina ka neongo ia ‘oku nau ngāue‘aki pe e ‘aho 1 Siulai ko e ‘aho faka‘ofisiale ia na‘e fokotu‘u ai.

Tokotaha Faka‘eke‘eke: Dr. ‘Unaloto, ko e ha ha ngaahi tefito‘i lelei kuo ke mamata tonu ai lolotonga ho‘o ‘i Siaina hono fakalele ‘o e fonua ‘e he Paati ko ‘eni ko e‘uhi foki kuo a‘u ki he ta‘u 11 ho‘o ‘i Siaina pea kuo ke feāngai mo e Paati?

Dr. ‘Unaloto Sili: Mālō ‘aupito, kole keu hufanga he fakatapú kae ‘atā mo‘oku keu tali atu e fehu‘i. Katoa e ngaahi ta’u neu nofo ai ‘i Siaina neu sio ai he ngāue ‘a e Paati Kominiusi ‘a Siaina ki hono fakamu‘omu‘a ‘a hono kakai ‘i he me‘a kotoa pe ‘oku nau fai ke nau teke e mo‘ui ‘a e kakai ke fakalakalaka ki mu‘a. Na‘a nau feinga ‘o to‘o ‘osi ‘a e tau fakalotofonua mo e ‘ā vahevahe ‘a e nofo ‘a e kakai ‘o fakamavahe‘i ‘a e kau masiva mei he kau tu‘umālie pea mo e kau hou‘eiki mo e kakai masiva. Neongo na‘e lahi e ngaahi faingata‘a‘ia mo e ngaahi mamahi na‘e fou mai ai e paati ni ‘i he kuohili, ka ‘i he fakataha hono 18 ‘a e Paati ‘i he 2012 na‘e lea ai ‘a Palesiteni Xi Jinping te ne ngāue‘aki ‘ene taimi ‘i ‘ofisi ke vahe‘i kotoa ‘ene ngāue ki he to‘o ‘osi e masiva mo e tukuhausia mei he kakai e fonua ‘o kamata mai mei he ngaahi feitu‘u ‘uta. Na‘e ui e taumu‘a ko eni ko e Poverty Alleviation. Ko e taha eni e ngaahi taumu‘a ‘a e UN ‘oku ‘iloa ko e taumu‘a UN 2030. Ko e vīsone ‘a e UN ke a‘u ki he 2030 kuo to‘o ‘osi e masivesiva mo e tukuhausia mei māmani. Ka ‘i he ‘aho 21 ‘o Fepueli 2021 na‘e lea ai ‘a Palesiteni Xi Jinping ‘i he fakataha lahi ‘a Siaina ‘o ne fakamamafa‘i ai kuo a‘usia ‘ene taumu‘a kuo ne hiki e masivesiva ‘o to‘o ‘osi mei hono fonua, ‘aki ‘a ‘ene kamata mei he feitu‘u ‘uta. Na‘á ne ‘alu ‘o a‘u tonu ki he ‘u feitu‘u masiva taha pea ne ‘ai e ngaahi founga ke to‘o hake e anga e mo‘ui ‘a e kakai ke fakalakalaka ki ‘olunga. ‘I he ta‘u ‘e 100 ko eni ne tu‘uma‘u e Paati Kominiusi ‘a Siaina ‘i he‘enau taumu‘a ko e fekumi ki he fiefia ‘a hono kakai, fakakakato honau fatongia ki he kakai mo hono tuku e kakai ko e senitā ia ‘enau ngāue ‘oku fai ‘i he‘enau falealea. Na‘e sio mata e kakai heni pea nau falala leva ki honau pule‘anga mo e founga fakalele pule‘anga ‘a e Paati Kominiusi ‘a Siaina. Na‘e fakakakato leva ‘a e ‘unaloto mo e ngaahi mohe misi ‘a e tokataha tangata‘i fonua Siaina pē ko e Dream of the Chinese People ‘a ia ‘oku ‘iloa ko e fakalakalaka faka‘ekonōmika – Economic Prosperity, Fakalelei fakalotofonua – National Rejuvenation, Mo‘ui fiefia mo mo‘ui fakalakalaka – Happy and better life. Ko hono to‘o ‘osi ko eni e masivesiva mei he fu‘u kakai ‘e toko 1.4 piliona e kakai ‘o Siaina pe ko e vahe nima e taha ia ‘a e kakai kotoa ‘o māmani. Na‘e ‘omai ‘e he Paati koeni ‘a e me‘a lalahi e 5 pe ‘oku ‘iloa ko e 2 Assurances mo e Kualenitoa ‘e 3 – 3 Guarantees. Koe 2 Assurances ko e: ma‘u e me‘akai fe‘unga mo e vala ke tui mo mafana pea mo e 3 Guarantees ‘a ia koe tokotaha kotoa pe kuopau ke ako access to school, lava ‘o ma‘u ngaahi e sēvesi fakafalemāhaki – medical services pea mo e fale ke malu ki ai e taha kōtoa safe housing. Mei hono fakalelei‘i e ngaahi langa he fonua mei he vai, ‘uhila, fetu‘utaki pea mo hono malu‘i ‘o e angafakafonua ‘o Siaina ki he‘enau to‘o ‘osi e masivesiva, na‘a nau ngāue‘aki e tui ‘e 5 ‘a ia ko e loto’aki /lotolahi fe‘unga courage, vīsone , ongo‘i ‘oku ‘i ai hoto fatongia – sense of responsibility pea mo e vivili e loto ke tau‘i e ngaahi pole kehekehe- eagerness to take on challenges.

Ko hono ua pe me‘a nau fakatokanga‘i na‘e tui ‘a e Paati ko e tokotaha taki kotoa pe kuo pau ke ne ako e lao mo e tokāteline ‘o e fonua ke nau lava ‘o taki lelei mo fakahoko honau fatongia. He ‘ikai lava ke hoko ha taha ‘o ma‘u ha lakanga kapau he ‘ikai ke ne ‘ilo mo faka‘apa‘apa‘i e lao ‘o e fonua.

TokotahaFaka‘eke‘eke: ‘Oku ou tui ‘i he a‘u mai ko ia ki he houa ko eni Kenolo Siamelie Latu mo Dr ‘Unaloto Sili kuo kamata ke aata mai e maama e ngaahi fihi kuo mahino leva pea ‘oku ou fakamālō lahi atu koe‘uhi ko e ngaahi fakamatala ne mo tukumai ke lava ke mahino‘i e fakalakalaka ka teu tuku atu e faingamālie ni ke ke fakamā‘opo‘opo mai ‘etau talanoa.

Dr. ‘Unaloto Sili: ‘Oku ‘ikai ke toe ‘i ai ha‘aku me‘a ‘e tānaki atu ka ko ‘eku loto pe ke u kau hono fakamonū‘ia atu e kakai Siaina ‘i Tonga ni fakataha mo e ‘Amapasitoa Siaina he katoanga‘i ‘a hono a‘usia e ta’u 100 ko eni ‘o e Paati Kominiusi ‘a Siaina pea ‘i he lea faka-Siaina. 今天,我要向汤加华人社区表示热烈的祝贺,祝中国共产党建党100周年生日快乐!

Siamelie Lātū: Mālō ‘aupito Susana. ‘Oku ‘i ai pe ki‘i me‘a si‘i ‘oku ou fie lave ki ai kimu‘a pea tapuni ‘e tau polokalama. Ko e ‘uluaki, ‘oku fakamahino pe he polokalama ni kia hou’eiki kae ‘uma’a e kakai ‘o e fonuaa ‘oku ‘ikai ko ‘emau ‘i heni ke tu‘uaki e Pule‘anga Kominiusi ‘a Siaina ka ko ‘emau ‘i heni ko e ‘amanaki fakamanatu e ta‘u 100 ‘a e Paati kuo ne hiki‘i ‘a Siaina ki he tu‘unga mā‘olunga he ‘ahó ni. ‘Oku mahu‘inga foki ke tau siosio lelei ko e ha ha me‘a ‘e ‘aonga ki Tonga he langa fonua ‘a Siaina pea ‘oku totonu ke tau ako ai.

Ko e me‘a ‘oku ne lave‘i au he ngāue ‘a e paati ko eni ko ‘enau vahevahe e me‘a ‘oku ma‘u. Ko e ‘uhinga ia ‘oku fuopotopoto ai ‘enau tepile kai. ‘Oku tuku mai e me‘akai ki ai pea vilohi ke tau vahevahe ‘a e me‘a kotoa pe ‘oku ma‘u, ‘a ia ‘oku ne ‘omai ‘e ia ‘a e fakakaukau ‘o e nofo fakafāmili pe fakakōmiuniti, ko e me‘a ‘oku te ma‘u kuopau ke te vahevahe mo e kaungā‘api mo e ongo mātu‘a, kui, mo e mehekitanga, pe ko e fa‘ētangata. Kehekehe ia mo e tēpile tapafā ‘oku tau angamaheni ai he ngaahi falekai Uēsite. Ko e hā pe me‘a na‘a ke order ko ia pe ia te ke ma‘u me‘a tokoni mei ai. ‘Oku ‘ikai ha toe vekeveke ia ke vahevahe ‘a ia ‘oku ne ‘omai e fakakaukau ‘o e individualism ‘a ia ko e senita pe ‘ete mo’ui ‘iate kita pe. Ko ‘ete ngāue ma‘ata pe.

‘Oku ‘oatu foki ‘eku talamonu ki he ‘Amipasitoa pea pehe ki he‘ene kau ngāue mo honau kainga Siaina kotoa pe he fonua ni tauange ke nau ma‘u ha katoanga fiefia mo monu‘ia foki.

MALO

Leave a Reply

Your email address will not be published. Required fields are marked *