OLA LELEI NGAUE TOTOIVI ‘AE POTUNGAUE MO’UI, KEI HAO AI A TONGA MEIHE COVID19

8 ‘Aokosi, 2021.

‘Oku tokangaekina makehe foki ‘e he Pule’angá ‘a e kau pāsese Tonga ‘oku nau tuku vakā ‘i Fisi, talu mei ‘Epeleli ‘o e ta’u ni ‘i he mahino ‘e ‘ikai ke lava ‘o tu’uta ha vakapuna mei Fisi ki Nuku’alofa ni tupu mei he tu’unga ‘oku ‘i ai ‘a e Covid-19 ‘i he fonuá.

Fakatatau ki he Pule Lahi ‘a e Potungāue MEIDECC Paula Pouvalu Ma’u, ko e fakapotopoto taha pē ‘eni ‘o fakatatau ki he tu’utu’uni ‘a e Potungāue Mo’uí, ‘e kei mahu’inga ange pē ‘a e malu mo e hao ‘a e toko 100,000 tupu ‘i Tonga ni, pea ke fakapapau’i ‘oku kei hao pe ‘a Tonga mei he Covid-19.

Na’e fakahā ‘e Paula, na’e ‘osi fakahoko ‘a e tokoni fakapa’anga ‘a e Pule’angá tu’o ua ‘i he ngaahi mahina kuo ‘osí ki he kau pāsese tuku vakā ‘i Fisí pea ko hono tu’o tolu ‘eni ‘oku kei fakahoko ‘a e ngāue ‘a e Potungāue Pa’angá ki ai ke fakahoko ‘a e tokoní ke a’u ki Sepitema ‘o e ta’u ni.

‘I he fakamatala ‘a Paulá, ‘oku fakahoko pē foki ‘a e ngāue ‘a e Potungāue ki Muli felāve’i mo e kolonitini ‘i Nu’usilá pea ke fakapapau’i ‘e lava ke ma’u hanau nofo’anga ‘i he ngaahi feitu’u kolonitiní (MIQ). Ko e tokoni pe eni ‘a e Pule’anga hono kole ki he Pule’anga Nu’usila, ka ko e MIQ System ko e me’a fakafo’ituitui peia ‘a e tokotaha folau ke fakafonu mo muimui’i.

“Ko ‘ene ma’u pe honau place ai, pea ‘osi ‘enau kolonitini ‘aho ‘e 14 tenau omi ai pē ‘i he vakapuná hoko mei Nu’usila ki Tonga ni. Kuo ‘osi ‘i ai foki ‘a e kau pāsese Tonga ia mei Fisi kuo nau ‘osi ‘i Tonga ni kinautolu ‘a ia na’e ma’u honau place ki he MIQ pea na’a nau ha’u ai pē ‘i he vakapuna kuo ‘osí ki Tonga ni.”

Na’a ne pehē foki ‘oku ‘i ai mo e palani ‘a e Pule’angá ke ‘omai ‘a e kau pāsese tuku vakā ‘i Fisí, ka ‘e toki fakahoko atu ‘i ha maau ‘a e ngaue kiai. ‘I he taimi tatau ‘oku hokohoko atu aipe ‘a e fetu’utaki mo hotau kainga ko ‘eni ‘i Fisi, mei he Potungaue ki Muli, ‘o hange pe koia ki he ngaahi mahina kuo maliu atu.

‘I he’ene tu’u ‘i he taimi ni ‘oku ‘i ai ‘a e kau tuku vakā ‘e toko 75 ‘oku nau ‘i Fisi ‘o kau fakataha kiai ‘a kinautolu na’e folau hake mei ‘Amelika, kau Kauvaka na’a nau ‘i ‘Iulope, mo e kau ngāue fakamisinale tukukehe ange ‘a e fanau ako mo e kau Tonga ‘oku nau nofo, ako mo ngāue ‘i Fisi.

Kuo ‘osi fakahoko pe foki hono fale’i ‘a e kau pasese ko eni, ke nau huhu malu’i ‘i he fengāue’aki ‘a e Pule’anga mo e Potungāue Mo’ui ‘a Fisi, ke malu’i kinautolu lolotonga ‘a e taimi ko eni ‘oku nau talitali ke foki mai ki Tonga ni ‘i ha’ane faingamālie.

Palani ke tu’uta vakapuna ‘e 4 ‘i ‘Aokosi
‘Oku fokotu’utu’u foki ke tu’uta ‘i ‘Aokosi ‘aho 25 ‘a e vakapuna ‘e fā ‘i Nuku’alofa ni mo e kau pāsese fakakātoa ‘e toko 350 ki he 400. Ko e vakapuna ‘e fā ko ‘ení mei ‘Okalani, Brisbane, Pangopango pea mo Vanuatu.
Fakatatau kia Paula, ‘oku ‘i ai ‘a e palani ke fakahoko ‘a hono fakamavahe’i makehe (quarantine) kinautolu ‘i Tanoa, Makeke, Kupesi mo e konga ‘i he Kemi Taliai.

“Ko e vakapuna ko ia mei Pangopango, Vanuatu pea mo Brisbane na’e toloi mai mei he mahina kuo ‘osí. ‘E makatu’unga ‘a e tū’uta ‘a e vakapuná mei Brisbane mei he tu’unga ‘e ‘i ai ‘a e Covid-19 ‘i he vahefonua ni.

“Kuo a’u ‘eni ki he kau pāsese kotoa ‘e toko 2,883 kuo ‘osi fakafokifoki mai ki Tonga ni mei he toko 5000 tupu na’e lesisita mai ‘i he polokalama ki hono fakafokifoki mai ‘a hotau kāinga Tonga tuku vakā ‘i he ngaahi fonua mulí.”
‘I he fakamatala ‘a Paula neongo ‘a e fetō’aki ‘a e lēsisitá ka ko e palani ngāue ko ia ki hono fakafokifoki mai ‘a e kau pāsese ‘e toko 350-400 ki he mahina pea ‘i he mahina ‘e nima ko ‘eni ‘oku toé, ko e faka’amú ke a’u ki Tisema ‘o e ta’u ni pe Sanuali ‘o e ta’u fo’ou, kuo ofi ki he kakato ‘a hono fakafokifoki mai ‘a e kāinga Tonga tuku vakā ‘i he ngaahi fonua mulí.

‘I he taimi tatau ‘oku ‘i ai ‘a e faka’amu mei he Potungāue Mo’uí ke a’usia ‘a ‘enau taumu’á ke huhu malu’i Covid-19 ‘a e peseti ‘e 70 ‘a e fonuá ‘i he Tisema ‘o e ta’u ni, ka e vakai’i ha taimi ke fakaava ai ‘a e fefolau’aki.

Polokalama ‘ikai toe kolonitini ‘i Nu’usila
‘Oku hokohoko atu ai pe foki mo e ngāue mo e Pule’anga Nu’usila ke folau atu mei Tonga ni ‘o ‘ikai to e kolonitini ‘i Nu’usila, ‘o fakaangaanga ke kamata ‘i he mahina katu’u.

‘E kau ki ai ‘a e kau nofo fonua ‘i Nu’usila (citizen), kau pepa nofo fonua ‘i Nu’usila (permanent resident), kinautolu ‘oku ‘ave fakafalemahaki mo e kau toli fo’i’akau, pe ha to e taha kuo foaki kiai he Pule’anga Nu’usila ha visa ke nau tū’uta ‘i Nu’usila.

Leave a Reply

Your email address will not be published. Required fields are marked *